Monday, June 21, 2010

Би хэтэвчинд чинь багтахгүй


Эрэгтэй хүний нүдээр эмэгтэй хүн гэж байхаа боличихсон байна. Бүр ор сураггүй алга болчихож. Харин бүгдээрээ эд бараа болж хувираад үнэ бичсэн шошго тэмдэгтэйгээ алхаж явдаг болжээ. Тэгээд л эрчүүд дэлгүүрийн лангуун дээрээс сонгож байгаа аятай гудамжаар зөрөх “бараануудыг” гэдсээ илэн, уруулаа хазлан хомхой харцаар ажиглангаа түрийвчээ тэмтэрч үздэг болчихож. Бэл нь хүрэхгүй нэг нь хулгайн харц шидэж, хоосон горидохоос цаашгүй. Угаасаа үнэгүй юм гэж хаа ч байхгүй...

Эрчүүд ямар ч хүсэл эрмэлзэл, эрх мэдэл бас зүрх байхгүй хөөрхөн гэгчийн хүүхэлдэйнүүдийг хийц хэмжээнээс нь хамаараад худалдаж авах сонирхолтой болчихож. Зарим нэг нь бүр хэд хэдээр нь аваад энд тэндэхийн агуулахад хадгална гээч. Тэгэхээр зөвхөн эр хүйстнүүд “хүн” гэдэг төрлийг төлөөлж хорвоо дээр үлдсэн байж таарлаа. Харин эмэгтэйчүүд бол тэднийг амьдрахад нь туслах багаж хэрэгсэл төдий зүйл байх нь...

Тэр хөөрхөн “хүүхэлдэй” нь юу боддог, юу хийж чаддаг, ямар өнгөнд дуртай, алгебр эсвэл химидээ сайн, бороо эсвэл цасны алийг таашаадаг, фанта спрайт коланы алийг нь хэрэглэдэг болох огт падгүй. Зүгээр л дэгжин чамин байж бусдын өмнө гэрэлтсэн энгэрийн зүүлт, орон дотор халуун пийшин нь болж, бусад үед түрийвчний мухарт хэвтэж байхад боллоо. Болж өгвөл толгой нь ажилладаггүй шинэ “үүлдрийн” эмэгтэй бүтээлгэчих гээд эрдэмтэн судлаачдыг мөнгөөр зодож байгаа сураг ч дуулдсан. Махан биетэй болохоос хийлдэг хүүхнээс ер нь ялгаа байхгүй.

Зах зээлийн хуулиар эрэлтийг дагаж нийлүүлэлт өсдөг билээ. Эдгээр эрчүүдийн түрийвчинд багтаад “хийлдэг хүүхэлдэй” болох сонирхолтой охид байдагийг үгүйсгэхгүй ээ. Гэхдээ бас буруутгахгүй. Угаасаа эмэгтэй хүн бол хүн биш бараа гэсэн нүдээр ажиглуулаад сурчихсан нийгэмд өөрийгөө бараа гээд багаасаа тархиа угаалгачихсан ч юм бил үү? хэн мэдлээ.
Гэхдээ эрчүүд эд бараа гэж хардаг ч өөрийгөө хүн гэдгээ мэддэг, мэдэрдэг бүсгүйчүүд зөндөө бий. Бие цогцос, ухаан бодолоо, хамгаас чухал нэр төрөө нандигнан эрхэмлэж тэргүүнээ өндөрт өргөж явдаг охид байдаг юм. Бас өөрсдийгөө хүн гэдгээ мэдэхгүй хийлдэг “хүүхэлдэйн тавилантайгаа” эвлэрсэн ижил заяатнуудаа сэрээж орилохыг хүсдэг юм. Би тэдний нэг нь гэж бардам хэлж чадна.

Үнэлж чадамгүй угаас барамгүй хүн гэдэг махбодинд төрсөн болохоор түүнийхээ ашгийг арай өөр байдлаар гаргахыг хүсдэг билээ. Хэн нэгэн эрхмийн хэтэвчинд би багтахгүй. Тэр бол шившиг. Харин замын хог цэвэрлэгч, албан газрын 00 угаадаг үйлчлэгч хийхээсээ би ичихгүй. Өөрийн чадлаар амьдарч байгаа болохоор бахархал. Цэвэрхэн төрснийхөө төлөө байр машин бэлгэнд авахгүй, толгойгоороо тэдгээрийг чинь худалдаж авна.

Толгойгоо би тоотой хэдхэн тохиолдолд гудайлгана. Төрийнхөө сүлдний өмнө, төрүүлсэн ижий аавынхаа өмнө, сургааль айлдагч багшийн өмнө, ёсолж авсан ханийхаа өмнө ноомой дөлгөөн байх болно. Түүнээс биш зүг зүгээс ирэх самуун харц, садар яриа, амттан шимттэн алт мөнгөний өмнө би сөхрөхгүй. Алмаз сувд хэдий гялалздаг ч хайртын минь харцанд бүдгэрнэ. Арьс булга хэдий зөөлөн дулаан ч хайртын минь мойног гар шиг халуун биш. Сэтгэлт хоёрын аура нийлэхээрээ умгар амбаарыг ямар ч ордон харшаас илүү болгох чадалтай.

Дөт дардан замыг би сонгохгүй, гэнэт олдсон хоол гэдсэнд цөвтэй байдаг гэсэн. Бусад нь шоолж инээлдсэн ч хамаагүй бартаа саадтай тойруу тэр л замаар би алхана. Тэр зам залуу нас, зүсийг минь сорно уу хамаа алга. Хожим хүүхдүүдээ унтахад нь ярьж өгөх түүхээ бүтээж байгаа нь тэр.
Хөрс шороонд булагдах үед эд хөрөнгө биш түүх л үлдэж энэ нэг ийм хүн байсан шүү гэж нотолно.

Ааш муутай байсан гэнэ үү, адайр зантай байсан ч гэнэ үү хамаа алга. Харин энэ бүсгүй эд бараа шиг биш өөрийн дураар уйлж дуулж, уярч хайлж, дурлаж догдолж, уурлаж гутарч, бас инээж баясаж өөрөө шийдвэрээ гаргаж яг л хүн шиг амьдарсан юм. Хэн нэгний алтан торонд биш, хэн нэгний мөнгөн гинжинд биш, хэн нэгний түрийвчний баталгаа болсон хүүхэлдэй биш яг л хүний ёсоор амьдарсан. Өөрийн зүрх сэтгэл, хүсэл мөрөөдлөө Louis Vuitton цүнх эсвэл Land Cruiser машинаар солиогүй энгийн хүний жамаар тэр амьдраад үхсэн юм. Яг ингэж хүн шиг амьдарсан мянга мянган бүсгүйчүүдийн нэг юм гэж миний түүх хойч үед хүүрнэх ёстой.

Тийм түүхээ бүтээж байгаа болохоор бидэнд өөрийн чинь хэтэвчинд орох хүсэл алга. Битгий эд бараа гэсэн нүдээр хар, бид бүгдээрээ үнийн шошгоо тасдаад хаячихсан!!!

2010/05/10

О.Агиймаа

7 comments:

  1. taalagdlaa, odoo ueiin ohid busguichuudiigee unshaad negiig bodoosoi gj husej bn...

    ReplyDelete
  2. brilliant!!!!!!!!!!

    ReplyDelete
  3. Агиймаа! Hайз минь чиний блогийг уншаад омогших сэтгэл буцалж, урам баясал төрж байна. Олон олон маш олон охид бүсгүйчүүд минь Үгүй гэж бардам хэлээд харц өндөр золбоотой алхаж өөрийн хүсэл мөрөөдлөөрөө жигүүрлэн оюунлаг амьдраасай.. Баярлалаа. Бичээд байгаарай үзэсгэлэнт охин минь, Амжилт хүсье!
    Б.Энхгэрэл

    ReplyDelete
  4. uhaantai bichsen baina,,,
    uneher taalagdlaa

    ReplyDelete
  5. Баярлалаа бодож санаж хэлэх гэж эвлүүлдэг үгсийг минь сайхан бичиж. Би ч бас шошгогүй аан гэхдээ үнэгүй биш эмэгтэй.

    ReplyDelete
  6. chinii bichsen zuiluudiig ih durtai.dahin dahin unshaad baimaar. barag bugdiig n unshaad duustsan bh. oshoo goy surgamjtai zuiluudiig olniig bicheerei. AMJILT!!!!!

    ReplyDelete